Kjaraviðræðum slitið – undirbúningur verkfalla hefst

Í dag var viðræðum VR, Eflingar, Verkalýðsfélags Akraness og Verkalýðsfélags Grindavíkur við SA slitið hjá Ríkissáttasemjara. Þar með hafa félögin fengið heimild til að hefja verkfallsaðgerðir.

Í tilkynningu frá Eflingu vegna þessara atburða í dag segir m.a.:

Verkafólk á Íslandi hefur of lengi þurft að þola láglaunastefnu og stjórnlausan ójöfnuð. Verkafólk hefur skapað góðæri síðustu ára með vinnu sinni. Atvinnurekendur hafa þó neitað að ganga að sanngjörnum kröfum Eflingar og samflotsfélaga. Verkfall er þaulreynd og lögvarin aðferð stéttarfélaga til að jafna hlut vinnandi fólks gagnvart atvinnurekendum.

Allar verkfallsaðgerðir þarf að samþykkja í kosningu meðal þeirra félagsmanna sem verkfall tekur til.