ASÍ hefur alla tíð lagt áherslu á að konum og körlum sé gert jafn hátt undir höfði á vinnumarkaði. Jafn réttur og jöfn tækifæri kvenna og karla til launa og starfa eru grundvallar mannréttindi. Því hefur verið unnið að því að afhjúpa og uppræta kynbundinn launamun á vinnumarkaði. Jafnframt er lögð áhersla á að bæði konur og karlar geti samræmt fjölskylduábyrgð og þátttöku á vinnumarkaði.

Verkalýðshreyfingin hefur á undanförnum árum lagt vaxandi áherslu á jafnréttismálin sem málefni fjölskyldunnar í heild. Bent hefur verið á að skapa þurfi barnafjölskyldum betri skilyrði því hægt eigi að vera að sameina gott starf góðu fjölskyldulífi. Það er skilyrði þess að vinnumarkaðurinn geti þróast og staðist kröfur framtíðarinnar. Stytting vinnutíma og aukinn sveigjanleiki eru mikilvægar forsendur fjölskylduvænni vinnumarkaðar.

Aukin fjölskylduábyrgð og möguleikar karla til að taka virkan þátt í umönnun og uppeldi barna sinna er eðlilegur réttur þeirra og um leið mikilvægt innlegg í baráttunni fyrir bættri stöðu kvenna á vinnumarkaði.
Með lögum um fæðingarorlof sem samþykkt voru í maí 2000 hefur verið komið til móts við kröfur Alþýðusambandsins í öllum veigamestu atriðum.
Sama má segja um fullgildingu Evróputilskipunar um foreldraorlof og starfsfólk með fjölskylduábyrgð.