Peningastefnunefnd Seðlabanka Íslands ákvað í morgun að lækka stýrivexti um 1 prósentustig, úr 12% í 11%.  Gylfi Arnbjörnsson forseti ASÍ segist fagna ákvörðuninni þó ljóst sé að Alþýðusambandið vilji sjá enn meiri lækkun stýrivaxta á komandi mánuðum.

"Afstaða Alþýðusambandsins er skýr, hvorki heimili né fyrirtæki standa undir þessum háu vöxtum og því viljum við lægri stýrivexti," segir Gylfi.  "Vextirnir hafa hins vegar verið óbreyttir síðan í júní og því er það mikið fagnaðarefni að vaxtalækkunarferlið sé komið í gang að nýju.  Nú er mikilvægt að stjórnvöld skapi enn frekari forsendur fyrir lækkun vaxta þannig að markmið okkar um vaxtamun gagnvart evrusvæðinu náist sem fyrst.  Ef þetta er sett í samhengi við tilslökun á gjaldeyrishöftunum er ljóst að við erum á réttri leið," sagði Gylfi Arnbjörnsson forseti ASÍ.