Vísitala neysluverðs hefur hækkað um 7,6% síðastliðna tólf mánuði. Verðbólgan er því 5,1% stigum yfir verðbólgumarkmiði Seðlabanka Íslands og 3,6% stigum yfir efri vikmörkum verðbólgumarkmiðsins. Verðbólgan hefur ekki verið hærri síðan í mars 2002.

Það vekur athygli að vísitala neysluverðs án húsnæðis hækkar minna en vísitalan með húsnæði. Húsnæðisverð hækkar, en þó hlutfallslega minna en aðrir þættir vísitölunnar. Gengisfall krónunnar skýrir stóran hluta af verðhækkunum að undanförnu. Verð á bifreiðum og varahlutum hækkar mikið og einnig bensínverð. Að auki hækkar verð á mörgum öðrum innfluttum vörum s.s. vörum til tómstundaiðkunar.

Verðbólguhorfur eru dökkar. Búast má við því að veiking krónunnar skili sér í auknum mæli út í verðlag á næstu mánuðum. Seðlabankinn getur ekki annað en hækkað stýrivexti enn frekar nú í maí, þó ólíklegt sé að slík hækkun slái verulega á verðbólguna. Sú mikla verðbólga sem við búum við í dag rýrir kaupmátt þorra launafólks, eykur á skuldir heimilanna og greiðslubyrði lána. Þessi verðbólga er á ábyrgð ríkisstjórnarinnar. Því miður eru engin teikn á lofti að ríkisstjórnin ætli að axla ábyrgð á hagstjórninni og grípa til þeirra ráðstafana sem þarf til að koma böndum á verðbólguna. Það verður að gera þá kröfu til ríkisstjórnarinnar að hún viðurkenni það augljósa, efnahagsmálin eru í ólestri og það verður að gripa til aðgerða ef ekki á að fara enn verr.