Verðbólga mældist 18,1% í desember samkvæmt nýjustu útreikningum Hagstofu Íslands á vísitölu neysluverðs. Frá því í nóvembermánuði hefur verðlag hækkað um 1,52%. Verðhækkanir mælast nú líkt og undanfarna mánuði á all flestum vöruliðum vísitölunnar að bensíni og olíum undanskildu.

Mest áhrif til hækkunar á vísitölunni nú hafa verðhækkanir á húsgögnum, heimilistækjum og húsbúnaði sem hækkaði um 4,4% á milli mánaða og efni til viðhalds á húsnæði sem hækkaði um 7,2% frá því í nóvember. Á síðustu 12 mánuðum hefur efni til viðhalds á húsnæði hækkað um tæp 45%.

Verð á mat- og drykkjarvörum hækkaði um 2,1% frá fyrra mánuði en hefur frá sama tíma í fyrra hækkað um ríflega 30%.

Þá hækkaði verð á áfengi um 9,2% sem að hluta til má rekja til hækkunar á áfengisgjaldi.

Af öðrum liðum má nefna að ritföng, leikföng o.fl. hækka um 2,4% á milli mánaða, flugfargjöld til útlanda hækka um 14,6% og lyf og lækningavörur hækka um 7,1% frá því í nóvember.

Á móti hækkuninni nú vegur verðlækkun á bensíni og olíum sem lækka um 8,6% frá fyrra mánuði en hefðu lækkað enn meira ef ekki hefði til komið hækkun á olíugjaldi. Þá hækkar kostnaður vegna búsetu í eigin húsnæði um 0,5% bæði vegna áhrifa af lækkun markaðsverðs og lækkun vaxta. 

Veikt gengi krónunnar er enn að skila sér út í verðlag og hafa mikil áhrif á verðbólguna, en þar að auki gætir nú einnig áhrifa af gjaldskrárhækkunum opinberra aðila. Líkt og Alþýðusambandið og fleiri aðilar bentu á í liðinni viku þá hafa nýsamþykktar hækknair á áfengis- og olíugjaldi áhrif til hækkunar á vísitölu neysluverðs og þar með áhrif til hækkunar á verðtryggðum skuldum heimilanna.