Sharan Burrow nýkjörin framkvæmdastjóri Alþjóðasambands verkalýðsfélaga (ITUC) lýsti miklum vonbrigðum með niðurstöðu fundar helstu efnahagsríkja heims sem lauk í Toronto í gær.  Meira aðhald í ríkisrekstri var ein meginniðurstaða fundarins og er stefnt að því minnka fjárlagahalla í þessum stóru hagkerfum um helming á næstu þremur áru. 

Burrow segir að með þessari ákvörðun séu leiðtogarnir að taka mikla áhættu á að annað alvarlegt samdráttarskeið ríði yfir heimsbyggðina.  „Atvinnusköpun og hærri laun er það sem ætti að drífa endurreisnina áfram og á síðasta ári virtist sem leiðtogarnir áttuðu sig á því. Nú senda þeir hins vegar frá sér misvísandi skilaboð.  Afleiðingin verður óhjákvæmilega meira atvinnuleysi, minni umsvif og það er ekki leiðin út úr kreppunni,“ segir Sharan Burrow í fréttatilkynningu.

Sharan Burrow tekur við framkvæmdastjóraembættinu í ITUC af Guy Ryder sem hefur gegnt því undanfarin 4 ár.  Hún er fyrsta konan sem gegnir þessu embætti en hún var áður forseti Alþýðusambands Ástralíu.

Til baka