asi - Frumvarp til laga um ívilnanir vegna nýfjárfestinga á Íslandi

18. maí 2010

Frumvarp til laga um ívilnanir vegna nýfjárfestinga á Íslandi

Reykjavík 18.05.2010

Tilvísun: 201005-0002

Efni: Umsögn um frumvarp til laga um ívilnanir vegna nýfjárfestinga á Íslandi, 574. mál.

Alþýðusamband Íslands hefur fengið til umsagnar frumvarp til laga um ívilnanir vegna nýfjárfestinga á Íslandi, 574. mál

Alþýðusamband Íslands styður þá breytingu sem felst í frumvarpinu að hverfa frá því fyrirkomulagi að gera sértæka fjárfestingarsamninga vegna einstakra verkefna á grundvelli sérstakra heimildarlaga frá Alþingi en setja þess í heildstæða löggjöf sem myndi ramma utan um þær ívilnanir sem stjórnvöldum er heimilt að veita vegna nýfjárfestinga á Íslandi.

Alþýðusamband Íslands telur mikilvægt að örva og efla fjárfestingu í atvinnurekstri á Íslandi með því að tilgreina með gegnsæjum hætti í lögum hvaða heimildir stjórnvöld og sveitarfélög hafa til að veita skilgreindar ívilnanir til fjárfestingarverkefna. Slík lagasetning eflir samkeppnishæfni Íslands gagnvart erlendri fjárfestingu og gerir Íslandi betur kleift að nýta þá sérstöðu sem landið hefur upp á að bjóða.

Alþýðusamband Íslands mælir með því að Alþingi samþykki frumvarpið.

F.h. Alþýðusambands Íslands

_________________________________

Ólafur Darri Andrason

Hagfræðingur ASÍ

Til baka

Félagsleg undirboð

Félagsleg undirboð háttsemi erlendra fyrirtækja sem lýsir sér einkum í því að starfsmönnum þeirra eru ekki greidd laun í samræmi við lög og kjarasamninga í gistiríki, þeim er ekki tryggður sá aðbúnaður og öryggi á vinnustað sem lög gera kröfu um og svikist er um að greiða lög- og samningsbundin gjöld af þeim til stofnana samfélagsins, þ.m.t. stéttarfélaga. Með þessu er brotið bæði á hagsmunum viðkomanda starfsmanna og grafið undan stofnunum samfélagsins, tiltrú almennings á þeim og vilja þeirra til að fjármagna þær með sköttum og öðrum gjöldum.