Alþjóðasamband verkalýðsfélaga (ITUC) hefur sent frá sér tilkynningu þar sem aukinni kúgun íranskra stjórnvalda gegn meðlimum verkalýðsfélaga er harðlega mótmælt. Háttsettir meðlimir Haft Tapeh verkalýðsfélagsins í Íran hafa verið handteknir á undanförnum dögum. Þeim hefur verið sleppt eftir yfirheyrslur en forseti félagsins hefur nú verið í haldi lögreglu í þrjá daga. Hinir handteknu hafa allir verið ákærðir fyrir áróður gegn ríkinu þegar þeir hafa í raun verið að berjast fyrir almennum réttindum launafólks, eins og útborgun launa á réttum tíma og mannsæmandi vinnuaðstöðu. ITUC hefur þegar skrifað forseta Írans nokkur bréf þar sem árásum gegn frjálsum verkalýðsfélögum og foringjum þeirra er harðlega mótmælt.