11. þing ETUC, Evrópusamtaka verkalýðsfélaga var sett í morgun í Sevilla á Spáni. Yfirskrift þingsins er ,,Í sókn; fyrir félagslega Evrópu, samstöðu og sjálfbærni”. Við setningu þingsins fluttu gestir ávörp, þar á meðal  José Manuel Barroso, forseti Framkvæmdastjórnar Evrópusambandsins. Ræddi hann m.a. um mikilvægt hlutverk evrópskrar verkalýðshreyfingar í þeim miklu breytingum sem Evrópa stendur frammi fyrir á tímum hnattvæðingar og aukinnar alþjóðlegrar samkeppni. Barroso lagði áherslu á að markmiðið væri ekki að hverfa frá því velferðarkefi sem byggt hefur verið upp í Evrópu, heldur að verja það og styrkja þann félagslega grundvöll og samstöðu sem Evrópa byggir á.

Cándido Méndez Radriguez, forseti ETUC undirstrikaði í setningarræðu sinni að meginverkefni þingsins væri að snúa varnarbaráttu undanfarinna ára í nýja sókn fyrir félagslegri Evrópu með samstöðu og sjálfbærni að vopni.

Fulltrúar ASÍ á þinginu eru þau Grétar Þorsteinsson, forseti ASÍ, Ingibjörg R. Guðmundsdóttir, varaforseti ASÍ, Gylfi Arnbjörnsson, framkvæmdastjóri ASÍ og Halldór Grönvold, aðstoðarframkvæmdastjóri ASÍ. Þingið stendur til 24. maí n.k.