Stofnun Vigdísar Finnbogadóttur í samvinnu við Alþjóðahúsið efnir til málþings föstudaginn 30. mars um stöðu innflytjenda á vinnumarkaðnum með tilliti til tungumálakunnáttu. Málþingið hefst kl. 14.00 og er haldið í Öskju, N132  (stóra sal) Háskóla Íslands og eru allir velkomnir.

Frummælendur málþingsins eru:

Gauti Kristmannsson, dósent í þýðingafræðum:

Samfélagstúlkun og fjölmenning, tækifæri til aðlögunar

Menntun mun vera ein heppilegasta leið til að jafna kjör og aðstæður þegna í hverju ríki og um leið veitir hún hæfileikafólki af öllum stigum tækifæri til að skara fram úr og þroskast enn frekar. Þetta á auðvitað við um innflytjendur eins og aðra, en forsendur þeirra eru aðrar en þeirra sem eru með þjóðtunguna að móðurmáli. Þeir koma vissulega oft vel menntaðir að öllu öðru leyti en í málinu og ólíkt nýfæddum einstaklingum geta þeir þegar hafið störf ef unnt er að taka á móti þeim. En vandinn kemur þá fram, tungumálaörðugleikar bæði á vinnustað og þegar verið er að sækja þjónustu til hins opinbera, þjónustu sem menn greiða oftast fyrir með sköttum frá fyrsta degi. Lausnarorðið hefur verið íslenskukennsla fyrir innflytjendur á sem breiðustum grunni og er það vel. En það ber vott um skammsýni að leggja áherslu á hana eina á kostnað túlkunar eins og gert var í nýlegri innflytjendastefnu ríkisstjórnarinnar. Íslenskunám tekur tíma og mikilvægir þættir í aðlögunarferli fara fram áður en menn ná góðu valdi á íslensku.

Halldór Grönvold, aðstoðarframkvæmdastjóri ASÍ:

Hindranir og tækifæri.

Halldór mun fjalla um fjölgun útlendinga á vinnumarkaði síðustu misseri og hvernig þessar breytingar horfa við innflytjendunum annars vegar og þeim sem fyrir voru á vinnumarkaði hins vegar. Einnig mun hann ræða hvaða hlutverki tungumálið (íslenskan) gegnir í þessu samhengi og hvað verkalýðshreyfingin hefur verið að gera til að mæta þeirri þörf fyrir upplýsingar og íslenskukennslu sem skapast hefur. Að lokum mun hann víkja að þeim ónýtta auð sem tungumálaþekking innflytjenda felur í sér.

Barbara J. Kristvinsson, ráðgjafi hjá Alþjóðahúsi:

Vinna meira –Tala minna: Hvað getur farið úrskeiðis þegar innflytjendur þekkja ekki réttindin sín?

Barbara ræðir um þau vandamál sem mæta innflytjendum á íslenskum vinnumarkaði, mismun á vinnumenningu, viðhorfum og væntingum starfsmanna og stjórnenda. Þá mun hún einnig ræða um tungumálakennslu sem nauðsynlega brú milli menningarheima.

Fundarstjóri er Laufey Erla Jónsdóttir, verkefnastjóri hjá Stofnun Vigdísar Finnbogadóttur, og umræðum stýrir Sólveig Jónasdóttir, verkefnastjóri hjá Alþjóðahúsi.